Feira do Leste estará no Festival Artes no Camiño de Sarria (Lugo) onde porá sobre as táboas o espectáculo Exilio das Moscas, así como varias actividades de dinamización cos veciños da vila lucense.
Será durante a semana do 7 ao 11 de agosto cando a compañía viguesa traballará cos veciños de Sarria nun proxecto centrado na memoria do pobo e os seus habitantes. Co título, Lembrazadas, Feira do Leste quere poñer sobre a escena as distintas voces que conforman un lugar, unha historia e unha forma de vida.
Tamén se exhibirá Exilio das Moscas, montaxe cunha clara dimensión performativa e posdramática, vinculado ao teatro físico e ás linguaxes escénicas e audiovisuais, que recolle temáticas de total actualidade: as migracións, o feminismo, o racismo, os abusos de poder, a guerra, as raíces e a sátira política. Será o mércores 9 ás 21.00 horas na Casa da Cultura de Sarria.
Así mesmo, o luns 7 ás 21.00 horas na Praza de Xoán Mª López presentarán Fragmentos, peza breve de teatro-danza en colaboración con Ars Combinatoria.
O Festival Artes no Camiño é una cita imprescindible da danza, a música, a poesía e o teatro no entorno do Camino de Santiago francés que se leva realizando desde hai varios anos. Cunha clara perspectiva da difusión da cultura e a formación educativa, o festival contará na edición de 2017 cos obradoiros de Feira do Leste, así como con espectáculos de narración oral da man de César No e Ernesto Is.